Hor, hor, hor

Sæl öllsömul
Hvort það er kuldinn og bleytan á menningarnótt eða sú staðreynd að ég er að vinna í sýklabæli sem olli því að ég ligg í rúminu veit ég ekki en mikið var gaman að kíkja á prjónarana í Hallargarðinum á laugardaginn. Stemmingin hefði þó verið mun betri ef veðrið hefði verið skemmtilegra, var búin að sjá fyrir mér að krakkarnir myndu bara leika sér í grasinu meðan ég prjónaði. Kom þó við og keypti merki og lét eftir smá prjónaskap. Ég hafið ekki vit á því að klæða börnin í pollagalla áður en við fórum með strætó frá Hafnarfirði til höfuðborgarinnar og þurfti því að fara hratt yfir allt sem búið var að setja á dagskrána fyrir daginn.

Af prjónaskap er það að frétta að ég er byrjuð á jólagjöfunum í ár og þegar ég verð aðeins hressari set ég smá sýnishorn hér inn.

Kveð í bili, leggst aftur í rúmið....

Smá hliðarspor :)

Já já já, kápan ég veit.

Komst að því að tvíburarnir sem eiga að fá kápurnar eru bara 5 mánaða og nota þær ekki fyrr en kannski um 1 árs.... ákvað að fresta því augnablik,, en er smátt og smátt að klára,,, þarf að hekla ansi marga litla hringi á húfuna sem fylgir með....

En að hliðarsporinu frá kápunni. Kallinn farinn í veiði og þá fer alltaf allt á flug. Fór niður í kjallara aðeins, þar sem ég er með vinnuaðstöðu, og náði í nokkur box og smá garn. Ætlaði að fara að prjóna mér tösku sem ég fann í einhverri bók á bókasafninu en endaði með því að búa til hálsmen... hahaha

Var að endurútfæra hálsmen sem ég bjó einu sinni til og er svona smá uppáhalds hálsmen hjá mér. Vandræðin með að gera fleiri voru þau að það sem ég hengdi neðst í það keypti ég í Boston og hef hvergi fundið neitt í líkingu við það. Hef þó gert nokkur sem ég er aldrei eins ánægð með og það fyrsta.

Byrjaði á einu grænu áðan án þess að vera búin að ákveða hvað færi neðst og rakst svo á þetta frábæra, fíngerða garn sem ég notaði til að hekla utan um stóra perlu. Er frekar ánægð með útkomuna.

Bolurinn sem dóttir mín, the model, er með á myndunum gerði ég í sumarfríinu úr afgangs garni sem einnig fannst í kjallaranum.

Á sennilega eftir að vera að langt fram á kvöld, er alveg í ham......

þangað til næst... bæó

Prjónað til góðs

Spennandi viðburður framundan fyrir prjónara landsins. Prjónað til góðs á menningarnótt þar sem prjónað verður, í bleiku, til styrktar krabbameinsfélaginu... Skoðið það betur hér. Ég ætla allavega að mæta og er byrjuð, reyndar að hekla. Hér er afraksturinn...

Já ég er enn að svíkjast undan kápunni,,,,, en henni fylgdi húfa líka og er ég að klára ,,dúllurnar" á húfunni núna.

Þar til næst,,,,

Gat ekki setið á mér. Þessi varð að koma, stalst aðeins áfram í gardínu heklið, lofa að klára kápuna á morgun. :)
Bara smá bútur kominn en varð að prufa og sjá hvernig þetta kemur út, ekki kannski mikið að marka. Liturinn sést ekki alveg nógu vel þar sem birtan er mikil úti en þær eru sem sagt GRÆNAR.

Jæja ætla að halda aðeins áfram áður en ég fer út með hundinn...

Þá er komið að því

Ég er dottin í netprjónið, loksins farin að líta upp frá prjónunum og gleyma mér á netinu. Hef alltaf verið í vandræðum með að ,,sörfa" á netinu eins og það er kallað, aldrei fundið neitt nógu spennandi, þar til nú. Prjónablogg, prjónasíður og prjónagrúppur eru gjörsamlega búin að heltaka mig þessa stundina.

Ákvað að láta slag standa og gera mitt eigið prjónablogg. Þá getið þið, sem hafið áhuga, kannski bara ég,, haha, fylgst með því sem er á prjónunum hverju sinni.

Er þessa stundina að stelast í að hekla mér gardínur. Á að vera að klára barnakápu sem ég tók að mér fyrir sumarfrí. Svakalega lítið eftir, á bara alveg rosalega erfitt með að halda mér við efnið. Set kannski inn mynd þegar ég er búin að klára hana, ætla að vera búin með hana fyrir mánudag því þá fer ég aftur í vinnuna eftir langt sumarfrí.

Byrjaði einmitt sumarfríið á því að hekla og sauma gardínur fyrir vinnufélaga og varð þá alveg veik fyrir hekluðum gardínum. Það þarf ekki að spyrja að því að mínar gardínur verða auðvitað grænar þar sem grænn er frekar ríkjandi í mínu lífi eins og þeir sem mig þekkja ættu að kannast við.

Allavega, stefnan er á kláraða kápu um helgina og kannski ég skelli inn sýnishorni af gardínunum um helgina líka, ef ekki þá endilega rekið á eftir mér.

Kveð að sinni